శ్రీరామరాజ్యం

భోగి  పండుగనాడు మిత్రులు కార్టూనిస్ట్ జయదేవ్ ని ఫోన్ లో పలకరించాను. పరస్పర శుభాకాంక్షలు తెలుపుకున్నాం.  తర్వాత జయదేవ్ "ఏం, ప్రసాద్ ! శ్రీరామరాజ్యం సినిమా చూసావా? " అని అడగ్గా,  'లేద'ని చెప్పాను. "అరరే, నువ్వు  చూడాలి ప్రసాద్. గురువుగారు చాలా గొప్పగా తీసారు. నువ్వూ తనూ వెళ్ళండి. నేనూ ఈ మధ్యనే చూసాను. "అనగా,   "అదే, చూద్దాం అనుకుంటున్నాను." అన్నాను వాయిదా వేసే పద్దతిలో. "నీ సందేహం అర్ధమయింది, సినిమా చాలాబాగుంది, చూడు" అన్నారు. "సరే, నువ్వు చెప్పావు కాబట్టి, ఈపూటే వెళతాం" అన్నాను

     బాపు అభిమానినైన నేను ఆయన  సినిమాలు 'సాక్షి' మొదలు దాదాపు అన్నీ చూసాను. ఓసారి మిస్టర్ పెళ్ళాం షూటింగు  సమయంలో  బాపుగార్ని కలిసాను. కొద్దిపాటి   విరామ సమయం లో బొమ్మలకు రంగులు వేయడం   గురించి (వ.పా. గురించి చర్చకు వచ్చినప్పుడు)  చెప్పారు.   తర్వాత  షూటింగ్  పద్దతి చూసాను. బొమ్మ గీసినట్టు  చకచక  జరిగిపోతుంది.

    శ్రీరామరాజ్యం  నేను     మా  ఆవిడతో   చూద్దామని విడుదలయిన మొదటి రెండు మూడు రోజులు ప్రయత్నించాను. వీలుపడలేదు.   క్యూ  లో నిలబడే ఓపిక లేక దూరభారాలవల్ల  చాలా ఏళ్ళుగా సినిమాలు చూడడం మానేసాం, నేనూ మా ఆవిడా. నేనొక్కడనే  ఎప్పుడయినా  వెళతాను, చాల మంచి సినిమా అనంటే , అదీ అది వెళ్లి పోయేముందు. 

     ఇప్పుడు జయదేవ్ చెప్పాకా,  ఇక వెళ్ళడమే మంచిది  అనుకున్నాను. మా ఆవిడకు చెప్పాను. "నాకిప్పుడు వీలుపడదు. మీరు వెళ్ళిరండి" అని భోజనం పెట్టి  బయటకు తోసేసింది, మళ్ళీ వాయిదా వెయ్యకుండా. మాట్నీ సమయానికి   థియేటరుకు చేరుకొని , టికెట్  కొనుక్కొని  లోపలి కెళ్ళి  కూర్చున్నాను. అప్పటి వరకు టీవీ లో  ఏళ్ళతరబడి   కరాటే  (తెలుగు)సినిమాలు చూసి చూసీ మొద్దుబారి పోయిన  మెదడుతో , బండబారిన గుండెతో ఉన్న ప్రేక్షక మహా శయుల లో ఒకడిని  అయిన నాకు  ఈ పౌరాణికం చూడగలనా అని  బెంగ మొదలయింది.  వెంటనే   సినిమా మొదలయింది. 

   
  అంతే!

     ఒక  అత్భుత రంగుల  ప్రపంచం లోకి అడుగు పెట్టినట్టయింది నాకు. అయోధ్య రాజ వీధులు , శ్రీరాముని మందిరాలు , వాల్మికి ఆశ్రమం.....అన్ని ...అన్నీ  కళాత్మకం!  అపురూపం !!  నాకు అక్కడ శ్రీరాముడు  సీత  కనిపించారే తప్ప   బాలకృష్ణ నయనతార కాదు ( ఈవిషయంలోనే మొదట నేను  సందేహ పడ్డది). నటులంతా బాపు కదిపిన బొమ్మలు. మహానుభావుడు రమణగారు వ్రాసిన మాటలతో నిండిన సన్ని వేశా లన్నీ గంభీరం, రాజసంతోనే కాక కరుణ రసంతో నిండి వున్నాయి. ఏవో బండ రాళ్లు తప్ప గుండె ఉన్న వారికి కంట నీరు తెప్పిస్తాయి. పాటలు, సంగీతం ఎంత హాయిగా వున్నాయో !!! చిత్రం మొత్తం మీద  ఒక్క క్షణం కూడా విసుగు అనిపించలేదు. 

    'పురుషులందు  పుణ్య పురుషులు వేరయా...'  అన్నట్టుగా, సినిమాలందు బాపు శ్రీరామరాజ్యం  సినిమా వేరు. ఇలాంటి చిత్రాన్ని చూడటానికి గుండెకు కళాత్మక  కళ్ళు ఉండాలి. 'సీతాకల్యాణం' తర్వాత సాంకేతిక పరంగా మరింత గొప్పగా తీసిన చిత్రం. రేపు టీవీ లో కాక ఇప్పుడే  థియే టర్లో  చూడాల్సిన  చిత్రం. 

    రావణ యుద్ధం తర్వాత శ్రీరాముడు సముద్రపు ఒడ్డున శిలపై కూర్చుని ఉంటాడు. వెనుక సముద్రపు  అలలు , ఆ అలల మధ్య శిలలు....  ఆ ఒక్క 
' ఫ్రేం '  నా మస్తిష్కంలో  బాగా  ముద్ర పడిపోయింది. 

    గురువు బాపు గారికి వందనాలు, అభివందనాలు!.

ఫోటోలు: మూవీస్  సులేఖ.కాం &
             సినిగోయర్  సౌజన్యం తో